Phili 2 | AOJFILIFITA | STEP | IpeꞋ pefaꞋ pepel Kraisi? IpeꞋ pegawa Krais okom nainailipa nandaꞋ opalef ipeꞋimi mape awanem? IpeꞋ pape ukup etifim paloma Ambal BuꞋunai Godi? IpeꞋ ukup mapoma pagiambama ipeꞋ atona etin? Endilisi, waf anama napomepa naꞋama.

Philippians 2

ApeꞋ mondaꞋ apeꞋ mofeꞋ owina esis sahin owan

1 IpeꞋ pefaꞋ pepel Kraisi? IpeꞋ pegawa Krais okom nainailipa nandaꞋ opalef ipeꞋimi mape awanem? IpeꞋ pape ukup etifim paloma Ambal BuꞋunai Godi? IpeꞋ ukup mapoma pagiambama ipeꞋ atona etin? Endilisi, waf anama napomepa naꞋama. 2 IꞋi naꞋama, pendaꞋ aeꞋ endanifel endilisi ma waf anama. Pepe ukup etifim, mimila God noloma sahin owan eaꞋ pepe opalef etifim endilisi. 3 IpeꞋ ina ukup mopoma ipeꞋ etipa pendaꞋ opeha enis epes safela agof ipeꞋimi luꞋum, owaꞋ. IpeꞋ pefeꞋ owina enis epes eaꞋ ina piꞋi pepe ilifa esis, owaꞋ. 4 IpeꞋ ina ukup mopoma ipeꞋ etipa, owaꞋ. Ukup mimila enis epes wapotiꞋ soloma maim amamaga esis ukup maꞋiami.

Krais nandaꞋ anan atona nape owin. Amama atom deiꞋ God nafelona nalata ilif

5 IpeꞋ pihapila ukup etifim siꞋi Krais Jisas okom naꞋiam.

6 Anan nape God endilisinai laꞋelaꞋef, eaꞋ ina okom naꞋi nohapila waf anama laꞋelaꞋef nope siꞋi God, owaꞋ.

7 Anan nowaꞋ alafuga ma waf anama eaꞋ deiꞋ nataga epen endilisinai nandaꞋ waf anama nataga agel aꞋana nandaꞋ opeh nape owina enis epes.

8 Esis satolona sati anan nataga epen endilisinai. EaꞋ nandaꞋ anan nafeꞋ owina God naloma epes. Naila okom Godi atona nafeꞋ nafeꞋ ma nagaꞋ lawag usiꞋinai tuꞋwanainai.

9 EaꞋ waf anama atona anan nandaꞋanai deiꞋ God nafelona nalata ilif endilisi. EaꞋ naseꞋana anona agel nikilaꞋ agof hiami.

10 Anan naseꞋana agel anama Jisasa anona nemaf epes soloma ambagof maim hiami mape heveni maloma anom amama mape etap anaeꞋ ilif owini hiꞋilam mindiwa nembawa ma anan mafela agel ananinai luꞋuna, 11 mowalapa basef miꞋiam naꞋama miꞋi, “Jisas Krais Anan Dembinai.” MondaꞋam naꞋama mefela agel Ahalomana Godi nolata ilif endilisi.

ApeꞋ mope siꞋi mafifili mope owina epes hiesi ma mihiꞋambas waf buꞋunai

12 EaꞋ ipeꞋ alupipei aeꞋipei, aeꞋ okom nainailipa. FowaꞋ laꞋelaꞋef ape alomepa ipeꞋ paila basef aeꞋami. EaꞋ deiꞋ wapotiꞋ pendaꞋam naꞋama etin. DeiꞋ ape laogon, ipeꞋ pendaꞋam laꞋelaꞋef pefeꞋ endilisi pikilaꞋ fowaꞋ pandaꞋami. God nandaꞋ opeh buꞋwami nakwahomepa waf aonai nofaꞋepa pitanimani. Amama atom deiꞋ ipeꞋ umbamehepa endilisi pembefa opeh Anan nandaꞋmepami. 13 DeiꞋ main, anan nandaꞋ opeh opalef ipeꞋimi nomon. Anan atona nafela ukup ipeꞋimi ma nagiambamepa pandaꞋ opeh siꞋi Anan atona okom naꞋiam. 14 Amamaga ipeꞋ paꞋi pendaꞋami, pekwaha basef pandahihianamami moloma waf sandahambasefasami. 15 PendaꞋam naꞋama ma pepe awasi Godi boꞋwepa ma basef o waf aonai aꞋepa. DeiꞋ pape paloma epes hiesi sape etap anaeꞋ, esis sakwaha waf buꞋunai sandaꞋ waf aonai. IpeꞋ pape palomas pihiꞋambasa basef ambal namunaimi siꞋi ondowa motawa ilif mafifima epes. PendaꞋam naꞋama ma nemaf akutainai Kraisi aeꞋ endanifel ma ipeꞋ ma egawa ina andaꞋ opeh akwaha pepel aeꞋanai naꞋa, owaꞋ. 17 IpeꞋ pembaleꞋefa God pandaꞋ opeh ananimi, amama siꞋi anom amamaga ipeꞋ pindalali paseꞋanami. IꞋi nambimb esis sehe egaꞋ sokoloꞋwa esimbel aeꞋami siꞋi enis sondolali sakoloꞋ ifat suꞋutip sandaꞋ ofa sondalalima God, eaꞋ hapaimi, aeꞋ endanifel. Nambim aeꞋ endanifel eloma ipeꞋ. 18 EaꞋ naꞋama etin ipeꞋ wapotiꞋ pendanifel pelome.

Pol naꞋipasa basefa Timoti nambimb nefeꞋ Filipai

19 IꞋi Dembinai Jisas niꞋi ahoꞋ, aꞋi nambimb ina nogota laona esapaꞋ Timoti nefeꞋmago ipeꞋ. Ma notanima nifiꞋi niꞋipi ipeꞋ pape andeandeꞋma pandaꞋ aeꞋ laꞋifiwi. 20 Timoti anan opaf etifina nalome. Okom ananinai natanea endilisi ma nigiambamepa ma pembaleꞋefa God laꞋifipa. Ina anona aman nape naꞋae siꞋi anan, owaꞋ. Anan atona. 21 Amam hiami mape maloma aeꞋ mumafi amamaga amamumi atom eaꞋ ina ukup maimaila mumafi opeh Jisas Kraisi, owaꞋ. 22 EaꞋ Timoti ina siꞋi amam, owaꞋ. IpeꞋ pegawa anan aman buꞋunai, okom naꞋi nigiambamepa. Anan nagiambame ma wawalipasa basef buꞋwami Godi siꞋi nogalomana nagiambama ahalomana. 23 Nemaf anama egawa amamaga hiami motagame miꞋimama, esapaꞋana nefeꞋmago ipeꞋ mehip. 24 AeꞋ ape laꞋifiwi ma Dembinai aꞋi anan nambimb nondaꞋme eaf ekwaha kalabus efeꞋmago ipeꞋ.

Pol naꞋipasa basefa Epafroditus nambimb nefeꞋ Filipai

25 AeꞋ okom naꞋi esapaꞋ Epafroditus nefeꞋmago ipeꞋ. Anan owalome aeꞋanai. Anan afaꞋ wandaoꞋoma wandaꞋ opeh Godi etin waitu laꞋififa ma nimanimi siꞋi soldia. FowaꞋ ipeꞋ pasapaꞋana nafiꞋi nagiambame. 26 Opaf ananinai nalef endilisi ma naꞋi nitilipa. EaꞋ anan okom nimanima ipeꞋ pameꞋ basefa awes nandaꞋana. 27 Endilisi fowaꞋ anan awasina naꞋi nogaꞋ. EaꞋ God nati anan uwahipina. EaꞋ ina nati anan atotona uwahipina, owaꞋ. Nati aeꞋ uwahipiwi wapotiꞋ. Anan nandaiwaꞋ endilisi ma opaf nimanina noseꞋalowe ma Epafroditus nogaꞋ. 28 EaꞋ aeꞋ okom naꞋi endilisi ma esapaꞋana nefeꞋmago ipeꞋ maꞋ petolona pendanifel ma opaf aeꞋanai awanena. 29 EaꞋ ipeꞋ pendanifel endilisi pefaꞋana ma agel Dembinai. Pefela agof amam naꞋamaimi. 30 DeiꞋ main, anan ina okom napoma nope namona, owaꞋ. Anan okom nohafela opeh Kraisi eaꞋ felefeleꞋ ma nogaꞋ ma nagiambame. Anan okom napome. DeiꞋ main, ipeꞋ papani laogon anan nahoꞋofepa nandaꞋ amama.